مواطن

مواطن يبحث عن وطن


عبدو سعيد .. انسان سعيد
عارف انه لازم يسوي رياضة عشان الصحة تكون تمام و يكون سعيد عشان اذا مرض ما راح يكون سعيد
صار يلعب كورة .. و لما صار فنان في الكورة البرازيلية و يتكلم برازيلي .. قالوله ما ينفع تلعب في المنتخب مانتا برازيلي
ركب الة الزمن و رجع لورا
صار يلعب صيني و يلبس صيني .. و لما صار فنان في فنون القتال .. قرر يفتح مدرسة تعليم فنون قتال في بلدة لما جا يعدل في حركات التمرين قالو عليه أصلا هو مو صيني ايش فهمه .. اهله هناك قالو صح هذا مو حقنا
ركب الة الزمن و رجع لورا
صار يلعب كريكت هندي .. كان يدرس هناك، و لما رجع بلده مافي أندية يشترك فيها و لا أحد فاهم اللعبة، قام يبغى يعلمهم قالو ما نحتاج نحنا أصلا بنلعب دراجة تعال نعلمك
ركب الة الزمن و رجل لورا
صار يلعب مقناص مع عويد و صنهات .. و صار قناص معاه صقر، يصيد أرانب لما رجع بلده ما حصل أرانب قالوله روح البر راح يصيد حصل أرانب بس في أرض راشد ولد عم صنهات، قالو جايك من طرف صنهات قالو الأرانب حقنا
ركب الة الزمن و رجع لورا .. بس شويا بعيد المرة دي
صار يركب حصان تعلم الفروسية في بلدة المرة هذي، صار فارس ممتاز و لما ضاقت الدنيا هاجر لجاره صنهات قالو انت صياد قاله لا أنا فارس قالو زي عنتر بن شداد ترى ما راح نزوجك انت عبد والعبد ما يصير سيد

ركب الة الزمن و جا يرجع ورا .. آلة الزمن قالتلو الي ورا خربان و الي قدام خربان وين تبغى تروح يا عبدو؟
قالها وديني أمريكا .. قالتلو زي مايكل جاكسون تغير لونك؟
طيب شويدن .. السويديين ما راح يفهموك؟
طيب أستراليا .. ما ينفع عنصرية و ضياع هوية؟
طيب اليابان .. لازم تروح صغير أو في بطن أمك .. كلامهم صعب؟
طيب كندا .. لازم تتكلم إنجليزي و تصير زيهم؟
طيب الحل .. خليك مواطن في وطن الأخلاق الإنسانية، تدعو لها كل الأديان و يريدها كل الشعوب و تتطلع لها كل الأمم .. تكن جميلاً بوصف فهمهم حميداً بأعراف الآخرين
عبدو .. الكلام دا ما يأكل عيش

آلة الزمن .. العيش عند الخباز، يا تشتري يا تشتغل

Comments

Popular Posts